അദ്ദിക്ർ

പ്രവാചകനോടൊപ്പം യുദ്ധങ്ങളില്‍ പങ്കെടുത്തിരുന്ന വിശ്വാസികളോട് ശത്രുസൈന്യത്തില്‍ പെട്ട ആരെങ്കിലും സലാം പറയുകയാണെങ്കില്‍ (അഭയം ചോദിച്ചാല്‍) അവനോട് 'നീ വിശ്വാസിയല്ല' എന്ന് പറയാനോ, 9: 6 ല്‍ വിവരിച്ച പ്രകാരം അവനെ വധിക്കാനോ പാടില്ല എന്നുമാത്രമല്ല, അവനെ അകമ്പടി സേവിച്ച് സുരക്ഷിത സ്ഥാനത്തേക്ക് എത്തിച്ചുകൊടുക്കുകയും വേണം. ഇന്ന് അജയ്യഗ്രന്ഥമായ അദ്ദിക്റിനാല്‍ പഠിപ്പിക്കപ്പെടുന്നതുപോലെയും മറ്റുള്ളവരെ പഠിപ്പിക്കുന്നതുപോലെയും 3: 79 ല്‍ വിവരിച്ച പ്രകാരം നാഥന്‍റെ പ്രൗഢരായ പ്രതിനിധികളായി നിലകൊള്ളുന്നവരാണ് വിശ്വാസികള്‍. അപ്പോള്‍ അവന്‍റെ സ്വഭാവവും പ്രവര്‍ത്തനങ്ങളും എല്ലാ ജീവികളോടും കാരുണ്യമുള്ള രീതിയിലായിരിക്കും. 48: 6 ല്‍ വിവരിച്ച പ്രകാരം നാഥന്‍റെ ശാപവും കോപവും വര്‍ഷിക്കപ്പെട്ട കപടവിശ്വാസികളോടും അതിനെ തള്ളിപ്പറയുന്ന അനുയായികളോടുമാണ് -അറബി ഖുര്‍ആന്‍ വായിക്കുന്ന ഫുജ്ജാറുകളോട്- വിശ്വാസി ശത്രുതയില്‍ വര്‍ത്തിക്കുക. വിശ്വാസി ഒരിക്കലും 4: 86 ല്‍ വിവരിച്ച പ്രകാരം നാഥനാല്‍ വധിക്കപ്പെട്ട കപടവിശ്വാസികളോട് അഭിവാദ്യം നടത്തുകയില്ല എന്നുമാത്രമല്ല, 4: 63 ല്‍ വിവരിച്ച പ്രകാരം അവരുടെ മനസ്സില്‍ തറക്കുന്ന വാക്കുകള്‍ പറയുകയും ചെയ്യുന്നതാണ്. 4: 85 ഓര്‍മിച്ചുകൊണ്ടാണ് വിശ്വാസി എപ്പോഴും നിലകൊള്ളുക. വിശ്വാസി നാഥനെ മാത്രം സേവിക്കുന്നവനാണെങ്കില്‍ കപടവിശ്വാസി പിശാചിനെ സേവിക്കുന്നവനും ഹൃദയത്തിലില്ലാത്തത് പറയുന്നവനുമാണ്. 9: 67-68 സൂക്തങ്ങളില്‍ വിവരിച്ച പ്രകാരം കപടവിശ്വാസികളായ പുരുഷന്മാരും സ്ത്രീകളും പരസ്ത്രീ-പരപുരുഷബന്ധത്തിനുവേണ്ടി അതിയായി കൊതിക്കുന്നവരും അതിനുവേണ്ടി ശ്രമിക്കുന്നവരും ലൈംഗിക അരാജകത്വം കണ്ടാലും അതിനെതിരെ അദ്ദിക്ര്‍ കൊണ്ട് പ്രതികരിക്കാതെ പരോക്ഷമായി അതിനെ അനുകൂലിക്കുന്ന തരത്തില്‍ മൂകസാക്ഷികളായി നിലകൊള്ളുന്നവരുമാണ്. 2: 234; 4: 49-50; 8: 22 വിശദീകരണം നോക്കുക.